A escritora María Xosé Lamas (Vilalba, 1961) dedícalle versos á cidade da Coruña: “calexas sombrías”,”marco inconfundíbel de mariña”… Tamén, o “desafío”.
A CORUÑA, A CIDADE, O DESAFÍO
Dende os azuis iris do mar enxergo
a liña topográfica lonxincua
-silueta inconstante- adormecida
no sono do solpor, dona do tempo.
Por enriba da pedra xa esquecida
das calexas sombrías onde agardan
as lembranzas nas horas ancoradas pregando polas voces que as rediman,
agroma o espertar cara o futuro
en prismas multiformes definidos
por contornos de luces reprimidas
nos que a vida se amosa en claroescuro de oitocentos matices expresivos nun marco inconfundíbel de mariña.
É A Coruña, a cidade, o desafío
que sinto dende a proa do navío.
