Nesta casa –número 12 da rúa Panadeiras– da Coruña naceu a actriz María Casares en 1922. Filla do avogado e político Santiago Casares Quiroga –foi ministro da II República Española durante o goberno de Azaña–, María Victoria Casares Pérez triunfou en Francia como actriz, onde residía como exiliada. Tiña 14 anos cando chegou a París en 1936 acompañando o seu pai ao exilio, tras o Golpe de Estado dese ano.
Tras entrar no Conservatorio de París en 1941, o primeiro papel profesional foi na obra A Celestina.
María Casares representou obras de Albert Camus –con quen mantivo unha relación– , de Sartre, Jean Anouilh, Jean Cocteau, Genet e Claudel, converténdose en musa do existencialismo francés.
En 1949 entra na Comédie Française e cinco anos máis tarde no Teatro Nacional Popular (TNP), compañía pública cunha forte preocupación social.
María Casares tamén foi actriz de cine onde chegou a ser moi popular, aínda que en España era silenciada.
Na actualidade, a casa da rúa Panadeiras –espoliada tras o Golpe de Estado de 1936– onde viviu María Casares e o seu pai –que fora presidente da II República Española– está convertida en Casa Museo Casares Quiroga.
Desde 1997, a Asociación de Actores e Actrices de Galiza entrega os Premios María Casares. A gala ten lugar no teatro Rosalía de Castro da Coruña, en datas próximas ao Día Mundial do Teatro, 27 de marzo.
Por outro lado, hai voces que piden que o Teatro Colón da Coruña pase a denominarse María Casares como homenaxe á actriz galega con máis éxito internacional.
Ademais dun Instituto de Ensino Secundario de Oleiros, unha rúa da Coruña –pola zona de Elviña– leva o nome de María Casares.
